Дэндүү юм.

Жагсагчид арай дэндүү юм!

Ардчилал, эрх чөлөөг маань боогдуулж байна гэж үзсэн жагсагчид архи ууж, цагдаа нарыг зодон, байшин галдан шатааж байгаа нь эрх чөлөөгөө эдэлж байгаа хэрэг үү?

Уран зургийн галлерейг шатаасан байна. Бодвол тэнд нь МАХН-ын зураг байсан юм байлгүй. Замаар явж буй машинруу чулуу шидэж, зогсож байсан машиныг шатаасан байна. Бодвол тэр машин нь МАХН-ын гишүүнийх юм байлгүй.

Соёлын төврүү дайран орж юм эвдэж, Соёл эрдэмийн хувцас, хөгжимийг эвдэн, хулгайлсан байна. Бодвол Соёлын төвд Соёл эрдэм хамтлаг ХУ намыг удирдлагуудад зориулан хөгжим тоглодог юм байлгүй.

Тушаал аван үүргээ биелүүлж байгаа цагдаа нарыг тойрч зогсон чулуу шидэж, хашлагаар хатгаж байх юм. Тэд нар бүгд ХУ-ыг дэмжиж хамгаалж байна гэж бодсон юм байх даа.

Энгийн иргэдрүү чулуу шидэж, зодсон гэх юм. Тэд нар чинь ХУ-ын гишүүд юм байлгүй дээ. ХУ-ыг дэмжсэн нь эрх чөлөөгүй, дайсны цэрэг болчихсон юм байх даа.

Жагсаал зохион байгуулагчид, намын удирдлагууд арай дэндүү юм!

Тэмцэе, нэгдэе, жагсая гэж уриалсан удирдагчид нь үймээн болоход нь алга болчихсон байгаа нь жагсаал зохион байгуулж байгаа хэрэг үү? (магадгүй гэртээ зурагт хараад хэвтэж байсан хэрэг биз). Цуглаанд хүмүүсийг турхирсан, түлхсэн хүмүүс энэ зүйлийн хариуцлагыг өөрсдөө яг хүлээж харагдана ш дээ.

Өөрийн намын байр суурийг илэрхийлж жагсагчидад хариулт өгөх ёстой эсрэг намын дарга нь хэвлэлийн бага хурлаар иргэдээсээ, дэмжигчидээсээ өөрсдийгөө хамгаалахыг хүсэж, уриалсан нь иргэний дайн, мөргөлдөөнийг үүсгэж болзошгүй юм биш үү?

Төр засаг, цагдаа нар арай дэндүү юм!

Жагсаал цуглааныг тараах гэж буй цагдаа нар нь холоос резинэн сумаар нэг иргэнийг буудаж зогсож байгаа нь жагсаалыг тарааж байгаа нь уу? (Зарим хэвлэл, зурагтаар 20-д хүнийг байлдааны сумаар буудсан тэднээс 2 нь үхсэн гэж мэдээлсэн байна. Хэрэвээ ийм зүйл болсон бол юу гэж хэлэхээ огт мэдэхгүй байна)

Эв нэгдлийг илэрхийлэгч эрхэм Ерөнхийлөгч маань бүх зүйл болж өнгөрсөн хойно Онц байдал зарлаж байснаас эхлэхэд нь дараж болоогүй юм байхдаа? Нэг бодлын аргагүй биз дээ. 2 цагдаа голдоо нэг бамбаатай, дуулгатай. Нулимас асгаруулагч, ус шүршэгчийг зурагтаар л харж байсан болохоос биш өөрсдөд нь хангалттай байх юм биш.


За ингээд бичээд байвал зөндөө л юм байна. Бичихээс дургүй хүрчихлээ. Зэрлэгүүдийн оронд амьдарч байгаа юм шиг л байна. Манай улс эдийн засаг, эд материалын хомсдол орсон биш боловсрол, ёс зүйн асар том хомсдолд орчихсон юм байна.

Өөрөө жагсаж, удирдаж давхиагүй мөртлөө өрөөл бусдыг муулж байгаа би бас нэг бодлын дэндүү юм. Хуруу нэмээгүй байж хушуу нэмсэн намайг уучлаарай. Бухимдсан сэтгэлээ бусдад хуваалцах үүднээс л бичсэн юм шүү.

Нэмж хэлэхэд I LOVE NEW UB гэж хөдөлгөөний хог хаяггүй, боловсон байж, хотын иргэд болцгооё гэснийг ихэд дэмжин, удахгүй тийм болно гэж бодон явж байсан чинь өчигдөрийн үймээн самууныг харсан чинь биелэхэд их хэцүү юм шиг харагдлаа. Хог хаях нь битгий хэл байшин шатааж, чулуу шидэж, хүн зодож байгаа залуучууд ................. арай дэндүү юм.